සන්නාලිය ~

පාන්දර පහේ සිට රෑ දහය වෙනකම්ම 
අසංවේදී මැසිම කරන ඔච්චම් නුඹට 
නුලටම දශමෙටම ඇඳුමේ හැඩ තල ගත්ත 
නමුදු ජීවිතේ නෑ හැඩ පේන ඉසව්වක

සන්නාලියක් වෙලා ජීවිතේ මහ ගන්න 
මල්ලිටයි නංගිටයි පොතක් පෑණක් ගන්න
අප්පච්චි ලෙඩ ඇඳේ බෑ වැඩක් කරගන්න 
හිත කීරී ගැහෙනවා පඩි දවස ලන්වෙත්දී 

මහන එක සළුවකින් මාසෙකට පඩි දෙන්න 
හැකි උනත් කපා ඇත නුඹේ සොච්චම් පඩිය 
හිනාවෙන හුඟ දෙනෙක් නුඹෙන් විලි වහගත්තු 
එපා නුඹ දුක් වෙන්න ඒ ඉන්නේ නිරුවත්තු ..

හැමදාම නියං නෑ එයිද වැහි වලාවක් 
හිත හදා ගන්නවත් හිතාගෙන ලං වෙච්ච 
පෙම්වතත් හැමදාම විමසන්නේ දැවැද්ද
දුක දැනෙන මෘදු හිතට මැසිම බර වැඩි නැද්ද ?

Share